ਕਹਿੰਦੇ ਨੇ ਕਿ, ਦਿੱਲੀ ਦੇ ਕਈ ਇਲਾਕਿਆਂ ਵਿੱਚ ਸਾਡੇ ਦੇਸ਼ ਦੇ ਪ੍ਰਧਾਨ ਮੰਤਰੀ ਦੇ ਪੋਸਟਰ ਚਿਪਕਾ ਦਿੱਤੇ ਗਏ ਹਨ ਕਿ, ਸਾਡੇ ਜਵਾਕਾਂ ਦੀ ਵੈਕਸੀਨ ਬਾਹਰਲੇ ਮੁਲਕ ਕਿਉਂ ਘੱਲੀ! ਹੁਣ ਭਲਾ ਇਹ ਕੌਣ ਹੁੰਦੇ ਨੇ ਪੋਸਟਰ ਚਿਪਕਾ ਕੇ, ਪ੍ਰਧਾਨ ਮੰਤਰੀ ਨੂੰ ਸਵਾਲ ਕਰਨ ਵਾਲੇ? ਸਵਾਲ ਤਾਂ ਪੱਤਰਕਾਰ ਵੀ ਨਹੀਂ ਕਰਦੇ ਇੰਨੀ ਦਿਨੀਂ ਪ੍ਰਧਾਨ ਮੰਤਰੀ ਜੀ ਨੂੰ! ਰੱਬ ਖ਼ੈਰ ਕਰੇ.!! ਇੱਕ ਪੱਤਰ ‘ਤੇ ਬੜੇ ਸਤਿਕਾਰ ਸਹਿਤ ਹਿੰਦੀ ਭਾਸ਼ਾ ਵਿੱਚ ਲਿਖਿਆ ਮਿਲਿਆ ਕਿ, ‘ਮੋਦੀ ਜੀ ਹਮਾਰੇ ਬੱਚੋਂ ਕੀ ਵੈਕਸੀਨ ਕੋ ਵਿਦੇਸ਼ ਕਿਉਂ ਭੇਜ ਦੀਆ’। ਭਲਾ ਕੋਈ ਪੁੱਛਣ ਵਾਲਾ ਹੋਵੇ ਕਿ, ਆਹ ਸਵਾਲ ਕਰਨ ਵਾਲਾ ਹੈ ਕਿ ਸਾਡੇ ਬੱਚਿਆਂ ਦੀ ਵੈਕਸੀਨ ਨੂੰ ਵਿਦੇਸ਼ ਕਿਉਂ ਭੇਜ ਦਿੱਤਾ? ਵੈਕਸੀਨ ਮੰਗਣ ਵਾਲੇ ਵਾਕਿਆ ਹੀ ਕਾਂਗਰਸੀ ਹੋਣਗੇ, ਇਹ ਕਾਂਗਰਸੀ ਪਹਿਲੋਂ ਤਾਂ ਵੈਕਸੀਨ ਨਾ ਲਗਵਾਉਣ ਦਾ ਡਰਾਮਾ ਕਰਦੇ ਸਨ ਅਤੇ ਹੁਣ ਮੋਦੀ ਜੀ ਦੀ ਆਲੋਚਨਾ ਕਰਨ ਵਿੱਚ ਰੁੱਝ ਗਏ ਨੇ। ਮਰਦੇ ਬੰਦੇ ਆਕਸੀਜਨ ਨਾਲ ਪਏ ਨੇ, ਪੌਦੇ ਲਗਾਉਣ ਦਾ ਤਾਂ ਐਵੇਂ ਡਰਾਮਾ ਹੀ ਹੋ ਰਿਹੈ। ਠੀਕ ਕਿਹਾ ਹੈ ਬਾਬੇ ਰਾਮਦੇਵ ਨੇ, ਕਿ ਆਕਸੀਜਨ ਤਾਂ ਕੁਦਰਤ ਨੇ ਸਾਡੇ ਆਲ਼ੇ ਦੁਆਲੇ ਵਾਧੂ ਰੱਖੀ ਏ, ਦੋ ਸਲੰਡਰ ਵੀ ਨਾਲ ਨੇ, ਜਿੰਨੀ ਮਰਜ਼ੀ ਆਕਸੀਜਨ ਖਿੱਚੋ, ਕੋਈ ਕੁੱਝ ਨਹੀਂ ਕਹਿੰਦਾ, ਐਵੇਂ ਰੌਲਾ ਪਾਇਆ ਕਿ, ਅਖ਼ੈ ਸਲੰਡਰ ਮਹਿੰਗਾ ਹੋ ਗਿਐ। ਰਾਮਦੇਵ ਅਤੇ ਮੋਦੀ ਜੀ ਬਾਰੇ ਕੁੱਝ ਬੋਲਣ ਅਤੇ ਲਿਖਣ ਤੋਂ ਪਹਿਲੋਂ ਮਾੜਾ ਮੋਟਾ ਪੜ੍ਹ ਲਿਆ ਕਰੋ, ਐਵੇਂ ਈ ਬਦਨਾਮੀ ਕਰਨ ਤੁਰ ਪੈਂਦੇ ਜੇ!

ਹਲਾ…! ਸੁਣਿਐ ਕਿ ਵੈਕਸੀਨ ਮੁੱਕ ਗਈ, ਪਰ ਮੁੱਕ ਕਿਵੇਂ ਸਕਦੀ ਐ? ਅਸੀਂ ਤਾਂ ਦੁਨੀਆ ਦੇ ਸਾਰੇ ਦੇਸ਼ਾਂ ਨਾਲੋਂ ਪਹਿਲੋਂ ਬਣਾ ਕੇ ਵੇਚ ਵੀ ਦਿੱਤੀ ਸੀ, ਫਿਰ ਮੁੱਕ ਕਿਵੇਂ ਗਈ? ਆਲੋਚਕ ਆਪਣਾ ਝੰਡਾ ਚੁੱਕ ਕੇ ਦੋਸ਼ਾਂ ਦੀ ਝੜੀ ਲਗਾਈ ਜਾ ਰਹੇ ਨੇ ਸਾਡੇ ਮੋਦੀ ਜੀ ਉੱਪਰ ਕੇ ਅਖ਼ੇ ਵੈਕਸੀਨ ਵੇਚ ਸੁੱਟੀ। ਮੋਦੀ ਜੀ, ਐਹੋ ਜਿਹਾ ਕੰਮ ਨਹੀਂ ਕਰ ਸਕਦੇ, ਜ਼ਰੂਰ ਕਾਂਗਰਸੀਆਂ ਦੀ ਚਾਲ ਹੋਣੀ ਹੈ, ਇਨ੍ਹਾਂ ਨੇ ਹੀ ਵੈਕਸੀਨ ਵੇਚੀ ਹੋਣੀ ਏ। ਤਿੰਨ-ਚਾਰ ਦਿਨ ਪਹਿਲੋਂ ਦਿੱਲੀ ਦੇ ਵਿੱਚ ਜਿੰਨ੍ਹਾਂ ਨੇ ਮੋਦੀ ਜੀ ਦੇ ਖ਼ਿਲਾਫ਼ ਪੋਸਟਰ ਚਿਪਕਾਏ ਸਨ, ਉਹ ਰਗੜੇ ਗਏ ਨੇ, ਪਰਚੇ ਦਰਜ ਕਰਕੇ ਪੁਲਿਸ ਨੇ ਕਈਆਂ ਨੂੰ ਅੰਦਰ ਸਲਾਖ਼ਾਂ ਪਿੱਛੇ ਸੁੱਟ ਦਿੱਤਾ ਹੈ, ਹੁਣ ਖਪੀ ਮਰੀ ਜਾਓ। ਵੱਡੇ ਪੱਤਰਕਾਰੋ ਬਚ ਕੇ ਰਿਹਾ ਜੇ, ਜੇਕਰ ਮਾੜਾ ਜਿਹਾ ਵੀ ਗੰਗਾ ਕੰਢੇ ਦੀਆਂ ਲਾਸ਼ਾਂ ਦਾ ਜ਼ਿਕਰ ਕਰਿਆ ਤਾਂ, ਖ਼ੈਰ ਨਹੀਂ ਬੱਚੂ। ਦਿੱਲੀ ਆਲ਼ੇ ਚੱਲੇ ਸੀ ਵੈਕਸੀਨ ਸਬੰਧੀ ਸੰਘਰਸ਼ ਕਰਨ, ਪੁਲਿਸ ਨੇ ਪਹਿਲੋਂ ਹੀ ਚੁੱਕ ਕੇ ਜੇਲ੍ਹੀਂ ਮਾਰੇ। ਕਹਿੰਦੇ ਸਨ ਕਿ ਅਖ਼ੇ, ਵੈਕਸੀਨ ਵਿਦੇਸ਼ ਭੇਜੀ, ਕਿਉਂ ਤੁਹਾਡੇ ਬਾਪ ਦੀ ਸੀ ਵੈਕਸੀਨ… ਜਾ… ਭੇਜ ਦਿੱਤੀ। ਭਗਤ ਬਣ ਗਿਆ, ਕੋਈ ਕਹਿੰਦਾ ਮੈਂ ਡਰ ਗਿਆ..! ਪਰ ਕੋਈ ਕੀ ਜਾਣੇ…, ‘ਨਾਚ ਨਾ ਜਾਣੋ, ਆਂਗਣ (ਵਿਹੜਾ) ਟੇਢਾ’ ਹੋ ਗਿਆ। ਗੱਲ ਤੁਹਾਡੇ ਪੱਲੇ ਨਹੀਂ ਪੈਣੀ ਪਾਠਕੋ, ਸਮਝੋ ਜਰ੍ਹਾਂ ਧਿਆਨ ਨਾਲ। ਵੈਕਸੀਨ ਵਿਦੇਸ਼ ਘੱਲੀ, ਆਕਸੀਜਨ ਵਿਦੇਸ਼ੋਂ ਮੰਗਵਾਈ ਵੀ ਤਾਂ ਹੈ। ਬੰਦੇ ਬੁੜੀਆਂ ਮਰ ਰਹੇ ਨੇ, ਇਹਦੇ ਵਿੱਚ ਸਾਡਾ ਕਸੂਰ ਨਹੀਂ, ਕਸੂਰ ਤਾਂ ਜਨਤਾ ਦਾ ਹੈ, ਜਿਨ੍ਹਾਂ ਨੇ ਚੁਣ ਕੇ ਸੱਤਾ ਵਿੱਚ ਬਿਠਾਇਆ।
ਸਭ ਤੋਂ ਪਹਿਲੋਂ ਲਖਨਊ ਤੋਂ ਖ਼ਬਰ ਆਈ ਸੀ, ਕਿ ਆਕਸੀਜਨ ਮੁੱਕ ਗਈ, ਹਸਪਤਾਲਾਂ ਵਾਲੇ ਕਹਿੰਦੇ ਕਿਵੇਂ ਕੰਮ ਚਲਾਈਏ? ਪਹਿਲੋਂ ਤਾਂ ਬਹੁਤਿਆਂ ਨੂੰ ਸਮਝ ਨਹੀਂ ਪਈ ਕਿ, ਰੁੱਖ ਵਾਧੂ ਲੱਗੇ ਹੋਏ ਨੇ, ਫਿਰ ਆਕਸੀਜਨ ਕਿਵੇਂ ਮੁੱਕ ਗਈ? ਲਖਨਊ ਨੂੰ ਐਨਡੀਟੀਵੀ ਨੇ ਲਾਸ਼ਨਊ ਦੇ ਨਾਂਅ ਨਾਲ ਛਾਪਿਆ। ਡਿਬੇਟ ਕੀਤੀ, ਕਿ ਲਖਨਊ ਵਿੱਚ ਕੋਰੋਨਾ ਪੀੜ੍ਹਤਾਂ ਦੀ ਮੌਤ ਆਕਸੀਜਨ ਖੁਣੋ ਹੋਈ ਹੈ। ਮੁੱਕੇ ਆਕਸੀਜਨ ਦੇ ਸਲੰਡਰ ਨੂੰ ਕਿਸ ਦੇ ਸਿਰ ‘ਤੇ ਰੱਖ ਕੇ ਭਰਦੇ, ਪੀੜ੍ਹਤਾਂ ਦੇ ਪਰਿਵਾਰਾਂ ਨੂੰ ਕੁੱਝ ਸਮਝ ਨਾ ਪਈ। ਮਰਦੇ ਗਏ, ਮਰਦੇ ਗਏ.. ਗਿਣਤੀ ਚੌਂਹ ਪੰਜਾਂ ਤੋਂ ਅੱਜ ਹਜ਼ਾਰਾਂ ਵਿੱਚ ਪਹੁੰਚ ਗਈ ਹੈ। ਇੱਕ ਪਾਸੇ ਆਕਸੀਜਨ ਮੁੱਕੀ, ਦੂਜੇ ਬੰਨ੍ਹੇ ਵੈਕਸੀਨ! ਹੁਣ ਆਕਸੀਜਨ ਬਾਰੇ ਤਾਂ ਕਹਿ ਹੀ ਸਕਦੇ ਹਾਂ ਕਿ, ਮੋਦੀ ਜੀ ਲਿਆਓ ਆਕਸੀਜਨ, ਅਸੀਂ ਤੁਹਾਨੂੰ ਵੋਟਾਂ ਘੱਤੀਆਂ ਨੇ। ਵੈਕਸੀਨ ਬਾਰੇ ਅਸੀਂ ਨਹੀਂ ਪੁੱਛਦੇ, ਕਿਉਂਕਿ ਵੈਕਸੀਨ ਤਾਂ ਮੋਦੀ ਜੀ ਨੇ ਪਹਿਲੋਂ ਹੀ ਵਿਦੇਸ਼ੀ ਜਹਾਜ਼ ਚੜ੍ਹਾ ਦਿੱਤੀ। ਕੋਰੋਨਾ ਵੈਕਸੀਨ, ਆਕਸੀਜਨ ਅਤੇ ਹੋਰ ਡਾਕਟਰਾਂ ਦੀ ਵਰਤੋਂ ਵਿੱਚ ਆਉਣ ਵਾਲਾ ਸਾਜੋ ਸਮਾਜ ਸਭ ਮੁੱਕਿਆ ਪਿਆ ਹੈ। ਇਹ ਗੱਲਾਂ ਭਗਤ ਜਨੋ ਅਸੀਂ ਨਹੀਂ ਜੇ ਕਹਿੰਦੇ, ਇਹ ਤਾਂ ਖ਼ਬਰਾਂ ਕਹਿੰਦੀਆਂ ਨੇ। ਦੇਸ਼ ਤੋੜਨ ਵਾਲੇ ਲੋਕਾਂ ਨੇ ਪਿਛਲੇ ਹਫ਼ਤੇ ਤੋਂ ਜਿਹੜੀ ਮੁਹਿੰਮ ਚਲਾਈ ਹੈ ਟਵਿੱਟਰ ‘ਤੇ.. ਕਿ ਅਖ਼ੇ ਵੈਕਸੀਨ ਵਿਦੇਸ਼ ਕਿਉਂ ਭੇਜੀ, ਆਕਸੀਜਨ ਦੇਸ਼ ਵਿੱਚ ਖ਼ਤਮ ਕਿਉਂ ਹੈ, ਉਹ ਗੱਲ ਜਰ੍ਹਾਂ ਕੰਨ ਖੋਲ੍ਹ ਕੇ ਸੁਣ ਲੈਣ, ਅਸੀਂ ਮੋਦੀ ਜੀ ਦੇ ਨਾਲ ਹਾਂ, ਮਰਨ ਦਿਓ ਜਿੰਨੇ ਮਰਦੇ ਨੇ, ਸਾਂਭ ਲਵਾਂਗੇ।

ਚੂੰਡੀਮਾਰਾਂ ਨੇ, ਟਵਿੱਟਰ ‘ਤੇ ਵੈਕਸੀਨ ਮੰਗਣ ਅਤੇ ਆਕਸੀਜਨ ਦੀ ਮੰਗ ਕਰਨ ਵਾਲੇ ਵੱਡੇ ਦੇਸ਼ ਧਰੋਹੀਆਂ ਦਾ ਸਾਥ ਦੇਣਾ ਸ਼ੁਰੂ ਕਰ ਦਿੱਤੈ। ਹੁਣ ਜਿਹੜੇ ਪਰਚੇ ਦਰਜ ਹੋਏ ਨੇ ਕਿ, ਵੈਕਸੀਨ ਦਿਓ, ਹੁਣ ਜਿਨ੍ਹਾਂ ‘ਤੇ ਪਰਚੇ ਦਰਜ ਹੋਏ ਨੇ, ਉਹ ਹੀ ਕਹਿ ਰਹੇ ਨੇ ਜ਼ਮਾਨਤ ਦਿਓ। ਵੈਕਸੀਨ ਜਿਹੜੇ ਸਾਨੂੰ ਦੇ ਨਾ ਸਕੇ, ਉਹ ਸਾਨੂੰ ‘ਡਾਰਕ ਚਾਕਲੇਟ’ ਖਾਣ ਨੂੰ ਕਹਿ ਰਹੇ ਨੇ। ਖ਼ਾਲੀ ਗੀਝਿਆਂ ਨਾਲ ਹੁਣ ਆਹ ‘ਡਾਰਕ ਚਾਕਲੇਟ’ ਕਿੱਥੋਂ ਲਿਆਈਏ? ਦੇਸ਼ ਦੇ ਸਿਹਤ ਮੰਤਰੀ ਜੀ ਨੇ ਪਿਛਲੇ ਦਿਨ ਇਹ ਡਾਰਕ ਚਾਕਲੇਟ ਦਾ ਜ਼ਿਕਰ ਆਪਣੇ ਇੱਕ ਇਸ਼ਤਿਹਾਰ ਵਿੱਚ ਕੀਤਾ ਸੀ। ਲੋਕੋ ਸੁਣੋ, ਜਰ੍ਹਾਂ ਡਾਰਕ ਚਾਕਲੇਟ ਮਹਿੰਗੀ ਹੁੰਦੀ ਹੈ, ਤੁਸੀਂ ਲਾਈਟ ਬੁਝਾ ਕੇ ਹਨੇਰੇ ਵਿੱਚ ਖਾਇਓ.. ਡੇਰੀ ਮਿਲਕ ਵੀ ਡਾਰਕ ਹੋ ਜਾਊ। ਖ਼ੈਰ, ਮੁੱਦੇ ‘ਤੇ ਆਉਂਦੇ ਹਾਂ ਹੁਣ ਵਾਧੂ ਹੋ ਗਈ ਵੈਕਸੀਨ ਮੰਗਣ ਵਾਲਿਆਂ ਦੀ ਗੱਲਬਾਤ.! ਮੇਰੀ ਤਾਂ ਆਂਟੀ ਜੀ ਨੇ ਕਿਹਾ ਕਿ, ਪੁੱਤ ਲਿਖਦੇ ‘ਨਾਚ ਨਾ ਜਾਣੋ, ਆਂਗਣ (ਵਿਹੜਾ) ਟੇਢਾ’। ਮੈਨੂੰ ਤਾਂ ਮਤਲਬ ਵੀ ਨਹੀਂ ਸੀ ਪਤਾ ਕਿ, ਇਹਨੂੰ ‘ਅਕਸਪਲੇਨ’ ਕਿਵੇਂ ਕਰਾਂ? ਆਂਟੀ ਨੇ ਸਮਝਾ ਦਿੱਤਾ ਕਿ, ਜਿਨ੍ਹਾਂ ਨੂੰ ਨੱਚਣਾ ਨਹੀਂ ਆਉਂਦਾ ਹੁੰਦਾ, ਉਨ੍ਹਾਂ ਨੂੰ ਜਦੋਂ ਕੋਈ ਨੱਚਣ ਲਈ ਕਹਿੰਦਾ ਹੈ ਤਾਂ, ਉਹ ਆਂਗਣ ਟੇਢਾ, ਮਤਲਬ ਕਿ ਕਹਿ ਦਿੰਦੇ ਨੇ ਕਿ, ਵਿਹੜੇ ਵਿੱਚ ਕਸੂਰ ਹੈ, ਜਿਹੜਾ ਟੇਢਾ ਹੈ। ਇਹੋ ਹਾਲੇ ਸਾਡੇ ਪੀ ਐੱਮ ਜੀ ਦਾ ਹੋਇਆ ਪਿਆ ਹੈ।

ਦੇਸ਼ ਚਲਾਉਣਾ ਤਾਂ, ਉਹਨੂੰ ਆ ਨਹੀਂ ਰਿਹਾ ਅਤੇ ਕਸੂਰਵਾਰ ਲੋਕਾਂ ਨੂੰ ਠਹਿਰਾਈ ਜਾ ਰਿਹੈ। ਹੁਣ ਅਸੀਂ ਇਹਦੇ ਵਿੱਚ ਦੋਸ਼ ਮੋਦੀ ਜੀ ਨੂੰ ਨਹੀਂ ਦਿੰਦੇ, ਅਸੀਂ ਤਾਂ ਜਨਤਾ ਨੂੰ ਕੋਸਦੇ ਹਾਂ ਕਿ, ਤੁਸੀਂ ਕੋਈ ਚੰਗਾ ਡਰਾਈਵਰ ਲੱਭਣਾ ਸੀ, ਜਿਹੜਾ ਮੁਲਕ ਚਲਾ ਲੈਂਦਾ, ਹੁਣ ਜੋ ਕੋਸੀ ਜਾਂਦੇ ਓ.! ਇੱਕ ਪਾਸੇ ਆਕਸੀਜਨ ਖ਼ਤਮ ਹੋਣ ਦੀਆਂ ਗੱਲਾਂ, ਦੂਜੇ ਪਾਸੇ ਵੈਕਸੀਨ ਖ਼ਤਮ ਹੋਣ ਦੀਆਂ ਗੱਲਾਂ, ਦੱਸੋ ਭਲਾ ਇੱਕ ਬੰਦਾ ਦੋ-ਦੋ ਕੰਮ ਕਿਵੇਂ ਕਰ ਲਵੇ? ਜਿਹੜੇ ਵੈਕਸੀਨ ਮੰਗ ਰਹੇ ਨੇ ਆਪਣੇ ਬੱਚਿਆਂ ਵਾਸਤੇ, ਉਨ੍ਹਾਂ ਨੂੰ ਵਾਸਤਾ ਹੈ ਸੱਚੇ ਰੱਬ ਦਾ ਕਿ, ਥੋੜ੍ਹਾ ਸਬਰ ਰੱਖੋ, ਅਗਲੀ ‘ਵੇਹ’ ਆਉਣ ਤੱਕ ਤੁਹਾਨੂੰ ਵੈਕਸੀਨ ਮਿਲ ਜਾਊ। ਐਵੇਂ ਪੋਸਟਰ ਚਿਪਕਾਇਆ ਕੁੱਝ ਨਹੀਂ ਮਿਲਣਾ। ਦਿੱਲੀ ਦੀ ਪੁਲਿਸ ਨੇ ਡੇਢ ਦਰਜਨ ਤੋਂ ਵੱਧ ਮੁਕੱਦਮੇ ਦਰਜ ਉਨ੍ਹਾਂ ਲੋਕਾਂ ‘ਤੇ ਕਰ ਦਿੱਤੇ ਨੇ, ਜਿਹੜੇ ਵੈਕਸੀਨ ਦੀ ਮੰਗ ਕਰਦੇ ਹੋਏ ਪ੍ਰਧਾਨ ਮੰਤਰੀ ਜੀ ਦੇ ਪੋਸਟਰ ਲਗਾ ਰਹੇ ਸਨ। ਉਹ ਕੌਣ ਸਨ, ਪੋਸਟਰ ਚਿਪਕਾਉਣ ਵਾਲੇ, ਸਾਨੂੰ ਨਹੀਂ ਪਤਾ, ਪਰ ਇੱਕ ਹਿੰਦੀ ਟੀਵੀ ਚੈਨਲ ਕਹਿੰਦਾ ਕਿ, ਪੋਸਟਰ ਚਿਪਕਾਉਣ ਵਾਲੇ ਮਜ਼ਦੂਰ ਸਨ। ਪੋਸਟਰ ਚਿਪਕਾਉਣ ਵਾਲੇ ਜਿਨ੍ਹਾਂ ਲੋਕਾਂ ਨੂੰ ਪੁਲਿਸ ਨੇ ਚੁੱਕਿਆ, ਉਨ੍ਹਾਂ ਦੇ ਹੱਕ ਵਿੱਚ ਇਸ ਵੇਲੇ ਕਾਂਗਰਸੀ ਆ ਗਏ ਨੇ ਸਿਆਸਤ ਕਰਨ।

ਮੋਦੀ ਜੀ ਦੇ ਬਾਰੇ ਕਾਂਗਰਸ ਦੇ ਸਾਬਕਾ ਪ੍ਰਧਾਨ ਰਾਹੁਲ ਗਾਂਧੀ ਨੇ ਟਵੀਟ ਵਿੱਚ ਲਿਖਿਆ ਕਿ ”ਮੈਨੂੰ ਵੀ ਗ੍ਰਿਫਤਾਰ ਕਰੋ।” ਉੱਥੇ ਹੀ ਕਾਂਗਰਸ ਪਾਰਟੀ ਦੀ ਜਨਰਲ ਸਕੱਤਰ ਪ੍ਰਿਯੰਕਾ ਗਾਂਧੀ ਵਾਡਰਾ ਨੇ ਆਪਣੇ ਅਧਿਕਾਰਤ ਟਵਿੱਟਰ ਅਕਾਊਟ ‘ਤੇ ਆਪਣੀ ਪ੍ਰੋਫਾਈਲ ਫ਼ੋਟੋ ਬਦਲ ਕੇ ਇਹੀ ਪੋਸਟਰ ਲਗਾ ਲਿਆ, ਜਿਸ ਵਿੱਚ ਲਿਖਿਆ ਹੈ, ”ਮੋਦੀ ਜੀ ਸਾਡੇ ਬੱਚਿਆਂ ਦੀ ਵੈਕਸੀਨ ਵਿਦੇਸ਼ ਕਿਉਂ ਭੇਜ ਦਿੱਤੀ?” ਆਹ ਕਾਂਗਰਸੀਆਂ ਦਾ ਪਹਿਲੋਂ ਪਤਾ ਸੀ ਇਨ੍ਹਾਂ ਨੂੰ ਮੋਦੀ ਜੀ ਦੇ ਕੰਮ ਨਾਲ ਨਫ਼ਰਤ ਹੈ, ਇਸੇ ਲਈ ਹੀ ਇਹ ਵੈਕਸੀਨ ਦੀ ਮੰਗ ਦੇਸ਼ ਦੇ ਲੋਕਾਂ ਲਈ ਕਰ ਰਹੇ ਨੇ। ਕਾਂਗਰਸੀਓ ਤੁਹਾਡੇ ਨਾਲੋਂ ਜ਼ਿਆਦਾ ਫ਼ਿਕਰ ਸਾਡੇ ਮੋਦੀ ਜੀ ਨੂੰ, ਦੇਸ਼ ਦੀ ਜਨਤਾ ਦੀ ਹੈ.! ਰਾਜਧਾਨੀ ਦੇ ਪੂਰਬੀ ਅਤੇ ਉੱਤਰ ਪੂਰਬੀ ਜ਼ਿਲ੍ਹੇ ਦੀਆਂ ਕਈ ਥਾਵਾਂ ‘ਤੇ ਮੁਲਕ ਦੇ ਚੌਕੀਦਾਰ ਵਿਰੁੱਧ ਪੋਸਟਰ ਲਗਾਏ ਜਾਣ ਨੂੰ ਗੰਭੀਰਤਾ ਨਾਲ ਲੈਂਦੇ ਹੋਏ ਦਿੱਲੀ ਪੁਲਿਸ ਨੇ ਵੱਖ-ਵੱਖ ਥਾਣਿਆਂ ਵਿੱਚ ਕਈ ਪਰਚੇ ਦਰਜ ਕੀਤੇ ਹਨ ਅਤੇ ਕਈਆਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਹੁਣ ਹਿਸਾਬ ਲਗਾ ਲਓ, ਵੈਕਸੀਨ ਅਤੇ ਆਕਸੀਜਨ ਸਲੰਡਰ ਮੰਗਣ ਵਾਲ਼ਿਓਂ, ਜੇਕਰ ਪ੍ਰਧਾਨ ਮੰਤਰੀ ਕੋਲੋਂ ਇਹ ਦੋਵੇਂ ਚੀਜ਼ਾਂ ਮੰਗੀਆਂ ਤਾਂ ਜੇਲ੍ਹ ਪੱਕੀ। ਨਾਗਰਿਕਤਾ ਸੋਧ ਕਾਨੂੰਨ ਦੇ ਵਿਰੋਧੀ, ਖੇਤੀ ਕਾਨੂੰਨਾਂ, ਕਿਰਤ ਕਾਨੂੰਨਾਂ, ਬਿਜਲੀ ਸੋਧ ਐਕਟ-2020 ਦੇ ਵਿਰੋਧੀ ਅਤੇ ਦੇਸ਼ ਦੀਆਂ ਸਰਕਾਰੀ ਕੰਪਨੀਆਂ ਤੇ ਵਿਭਾਗਾਂ ਦੇ ਵਿਕਣ ਦਾ ਵਿਰੋਧ ਕਰਨ ਵਾਲੇ ਪਹਿਲੋਂ ਹੀ ਦੇਸ਼ ਧਰੋਹੀ ਅਤੇ ਅੱਤਵਾਦੀ ਐਲਾਨੇ ਜਾ ਚੁੱਕੇ ਨੇ, ਕਿਉਂਕਿ ਇਹ ਸਭ ਮੋਦੀ ਜੀ ਦੇ ਖ਼ਿਲਾਫ਼ ਸਨ, ਤੁਹਾਨੂੰ ਹੁਣ ਸੋਚ ਲੈਣਾ ਚਾਹੀਦੈ, ਬੋਲਣਾ ਹੈ ਕਿ ਚੁੱਪ ਬੈਠਣਾ..! ਵੈਸੇ, ਮੋਦੀ ਜੀ ਹੈ ਤੋਂ ਮੁਮਕਿਨ ਹੈ।

ਗੁਰਪ੍ਰੀਤ