ਜਦੋਂ ਵੀ ਕੋਈ ਕੁਦਰਤੀ ਅਤੇ ਮਹਾਂਮਾਰੀ ਫੈਲਦੀ ਹੈ ਤਾਂ ਅਫਵਾਹਾਂ ਦਾ ਬਾਜ਼ਾਰ ਵੀ ਗਰਮ ਹੋ ਜਾਂਦਾ ਹੈ। ਅੰਧਵਿਸ਼ਵਾਸੀਆਂ ਨੂੰ ਆਪਣੇ ਜਾਲ ਵਿੱਚ ਫਸਾ ਕੇ ਲੁੱਟਣ ਵਾਲੇ ਪਾਖੰਡੀ ਜੋਤਸ਼ੀਆਂ, ਅਖੌਤੀ ਧਾਰਮਿਕ ਸਾਧਾਂ, ਸੰਤਾਂ ਗੁਰੂਆਂ, ਡੇਰਿਆਂ ਵਾਲਿਆਂ ਸਤਿਗੁਰੂਆਂ, ਬਾਪੂਆਂ,ਮਹਾਰਾਜਾਂ ਅਤੇ ਫਿਰਕਾਪ੍ਰਸਤ ਤਾਕਤਾਂ ਦੀ ਚਾਂਦੀ ਹੋ ਜਾਂਦੀ ਹੈ। ਕਿਉਂਕਿ ਸਾਡੀ ਰਗ ਰਗ ਅਤੇ ਦਿਮਾਗ ਵਿੱਚ ਅੱਜ ਦੇ ਸਮੇਂ ਵਿੱਚ ਕੁੱਝ ਨੂੰ  ਛੱਡ ਕੇ ਪੂਰੇ ਭਾਰਤ ਦੇ ਮਾਪੇ ਆਪਣੇ ਬੱਚਿਆਂ ਵਿੱਚ ਅੰਧਵਿਸ਼ਵਾਸ ਬਚਪਨ ਤੋਂ ਹੀ ਕੁੱਟ ਕੁੱਟ ਕੇ ਭਰ ਦਿੰਦੇ ਹਨ। ਜਿਸ ਦਾ ਸੰਤਾਪ ਬਹੁਤੇ ਬੱਚੇ ਸਾਰੀ ਉਮਰ ਭੋਗਦੇ ਹਨ। ਅਸੀਂ ਆਪਣੇ ਬੱਚਿਆਂ ਨੂੰ ਲਕੀਰ ਦੇ ਫ਼ਕੀਰ ਬਣਾਉਣ ਵਿੱਚ ਕੋਈ ਵੀ ਕਸਰ ਬਾਕੀ ਨਹੀਂ ਛੱਡਦੇ। ਬਚਪਨ ਤੋਂ ਹੀ ਧਾਰਮਿਕ ਸਥਾਨਾਂ 'ਤੇ ਲਿਜਾ ਕੇ ਉਨ੍ਹਾਂ ਨੂੰ ਮੱਥੇ ਘਸਾਉਣ, ਹੱਥ ਜੋੜ ਕੇ ਅਰਦਾਸਾਂ ਕਰਨ ਅਤੇ ਇੱਕ-ਦੋ ਰੁਪਏ ਦੇ ਕੇ ਚੜ੍ਹਾਵਾ ਚੜ੍ਹਾਉਣ ਦੀ ਆਦਤ ਪਾ ਦਿੱਤੀ ਜਾਂਦੀ ਹੈ। ਇਸ ਆਦਤ ਕਾਰਨ ਹੀ ਉਹ ਆਪਣੀ ਸਾਰੀ ਉਮਰ ਇਸ ਚੱਕਰਵਿਊ ਵਿੱਚੋਂ ਬਾਹਰ ਨਹੀਂ ਨਿਕਲ ਸਕਦੇ। ਉਨ੍ਹਾਂ ਦੀ ਇਸ ਆਦਤ ਕਾਰਨ ਹੀ ਪੁਜਾਰੀ ਵਰਗ ਦਾ ਧੰਦਾ ਚੱਲਦਾ ਰਹਿੰਦਾ ਹੈ। ਬਚਪਨ ਤੋਂ ਹੀ ਇਹ ਪੁਜਾਰੀ ਵਰਗ ਬੱਚਿਆਂ ਦੇ  ਦਿਮਾਗ ਵਿੱਚ ਇਹ ਗੱਲ ਕੁੱਟ ਕੁੱਟ ਕੇ ਭਰ ਦਿੰਦਾ ਹੈ ਕਿ ਕਰਮਾਂ ਵਿੱਚ ਜੋ ਲਿਖਿਆ ਹੈ ਉਹ ਭੋਗਣਾ ਹੀ ਪੈਣਾ ਹੈ ਅਤੇ ਸਾਡੇ ਮਾਪੇ ਵੀ ਸਾਡੀ ਲੁੱਟ ਖਸੁੱਟ ਜਾਰੀ ਰੱਖਣ ਲਈ ਪੁਜਾਰੀ ਵਰਗ ਦਾ ਪੂਰਾ ਸਾਥ ਦਿੰਦੇ ਹਨ।ਨਵੇਂ ਘਰ ਦੇ ਗ੍ਰਹਿ ਪ੍ਰਵੇਸ਼, ਵਿਆਹ ਸ਼ਾਦੀਆਂ ਤੋਂ  ਪਹਿਲਾਂ ਜਾਂ ਕਿਸੇ ਵੀ ਤਰ੍ਹਾਂ ਦੀ ਖੁਸ਼ੀ ਗਮੀ ਸਮੇਂ ਧਾਰਮਿਕ ਸਮਾਗਮ ਕਰਵਾਉਣੇ ਇਸ ਦੀਆਂ ਮੂੰਹ ਬੋਲਦੀਆਂ ਉਦਾਹਰਣਾਂ ਹਨ। ਮਾਪਿਆਂ ਨੇ  ਕਦੇ ਵੀ ਆਪਣੀ ਔਲਾਦ ਨੂੰ ਇਹ ਨਹੀਂ ਸਮਝਾਇਆ ਕਿ ਕੁਦਰਤ ਨੇ ਸਾਨੂੰ ਕੰਮ ਕਰਨ ਲਈ ਹੱਥ ਪੈਰ ਅਤੇ ਅਨੇਕਾਂ ਅੰਗ ਦਿੱਤੇ ਹਨ ਅਤੇ ਸੋਚਣ ਲਈ ਸਾਨੂੰ ਦਿਮਾਗ ਦਿੱਤਾ ਹੈ। ਇਸ ਦਿਮਾਗ ਦੀ ਵਰਤੋਂ ਕਰਕੇ ਅਸੀਂ ਆਪਣਾ ਜੀਵਨ ਸਫਲਾ ਕਰ ਸਕਦੇ ਹਾਂ। ਹੱਥ ਜੋੜ ਕੇ ਅਰਦਾਸਾਂ ਕਰਨ ਨਾਲ ਸਾਡੀ ਜਿੰਦਗੀ ਨਹੀਂ ਸੁਧਰਨੀ ਸਗੋਂ ਵਿਗੜਨੀ ਹੀ ਹੈ। ਇਹ ਹੱਥ ਕੁਦਰਤ ਨੇ ਸਾਨੂੰ ਇਸ ਲਈ ਦਿੱਤੇ ਹੋਏ ਹਨ ਤਾਂ ਕਿ ਅਸੀਂ ਕੰਮ ਕਰਕੇ ਆਪਣੀ ਜਿੰਦਗੀ ਸੁਧਾਰ ਸਕੀਏ। ਆਪਣਾ ਜੀਵਨ ਸੁਖੀ ਬਣਾ ਸਕੀਏ। ਪਰ ਸਾਨੂੰ ਤਾਂ  ਪੁਜਾਰੀ ਵਰਗ ਨੇ ਕਿਸਮਤਵਾਦੀ ਬਣਾ ਧਰਿਆ ਹੈ। ਪੀ ਐਚ ਡੀ ਕਰਕੇ ਆਪਣੇ ਨਾਂਵਾਂ ਅੱਗੇ ਡਾਕਟਰ ਲਿਖਵਾ ਕੇ ਮਾਣ ਮਹਿਸੂਸ ਕਰਨ ਵਾਲੇ ਵੀ ਅਨਪੜ੍ਹਾਂ ਵਾਂਗ ਧਾਰਮਿਕ ਸਥਾਨਾਂ, ਗ੍ਰੰਥਾਂ ਅਤੇ ਪੱਥਰ ਦੀਆਂ ਮੂਰਤੀਆਂ ਅੱਗੇ ਮੱਥੇ ਟੇਕਦੇ ਅਤੇ ਚੜ੍ਹਾਵਾ ਝੜ੍ਹਾਉਂਦੇ ਆਮ ਹੀ ਦੇਖੇ ਜਾ ਸਕਦੇ ਹਨ। ਫਿਰ ਮੈਨੂੰ ਇਹ ਗੱਲ ਸਮਝ ਨਹੀਂ ਆਉਂਦੀ ਕਿ  ਪੜ੍ਹੇ ਲਿਖੇ ਅਤੇ ਅਨਪੜ੍ਹ ਵਿੱਚ ਕੀ ਫ਼ਰਕ ਹੈ?ਅੱਜ ਕੋਰੋਨਾ ਵਾਇਰਸ ਦੇ ਰਾਜ ਵਿੱਚ ਵੀ ਸੰਪਰਦਾਇਕਤਾ, ਜਾਤ-ਪਾਤ ਦੇ ਨਫ਼ਰਤੀ ਬਾਣਾਂ ਦੀ ਖੂਬ ਵਰਤੋਂ ਕੀਤੀ ਜਾ ਰਹੀ ਹੈ। ਇੱਥੋਂ ਤੱਕ ਕਿ ਜਿਸ ਤਰ੍ਹਾਂ ਅਮਰੀਕਾ ਦਾ ਰਾਸ਼ਟਰਪਤੀ ਚੀਨ ਅਤੇ ਭਾਜਪਾ ਸਿਆਸਤਦਾਨ ਤਬਲੀਗੀ ਮਰਕਜ਼ (ਮੁਸਲਮਾਨਾਂ) ਪ੍ਰਤੀ ਆਪਣਾ ਜ਼ਹਿਰ ਉਗਲ਼ ਰਹੇ ਹਨ। ਇਸੇ ਤਰ੍ਹਾਂ ਹੀ ਲੁਟੇਰਾ ਅਖੌਤੀ ਧਾਰਮਿਕ ਅਤੇ ਸਿਆਸੀ ਗਿਰੋਹ ਵੀ ਲੋਕਾਂ ਵਿੱਚ ਅੰਧਵਿਸ਼ਵਾਸ ਦੀਆਂ ਜੜ੍ਹਾਂ ਪੱਕੀਆਂ ਕਰ ਰਿਹਾ ਹੈ। ਕੋਰੋਨਾ ਵਾਇਰਸ ਭੱਜੇ ਜਾਂ ਨਾ ਭੱਜੇ ਅਤੇ ਜਾਂ ਫਿਰ ਐਨੇਂ ਲੋਕਾਂ ਦੀ ਜਾਨ ਨਾ ਵੀ ਲਵੇ ਪਰ ਲਾਕ ਡਾਊਨ, ਕਰਫਿਊ ਅਤੇ ਸਮਾਜਿਕ ਦੂਰੀ ਦੀਆਂ ਸਰਕਾਰੀ ਨੀਤੀਆਂ ਕਾਰਨ ਲੱਖਾਂ ਲੋਕ ਭੁੱਖ ਕਾਰਨ ਮੌਤ ਦੇ ਮੂੰਹ ਵਿੱਚ ਜਰੂਰ ਚਲੇ ਜਾਣਗੇ ਅਤੇ ਰਿਸ਼ਤਿਆਂ ਵਿੱਚ ਜੋ ਦੂਰੀ ਪੈ ਜਾਏਗੀ ਉਸ ਦਾ ਖਲਾਅ ਕਦੇ ਵੀ ਨਹੀਂ ਭਰਿਆ ਜਾ ਸਕੇਗਾ।
ਬੇਸ਼ੱਕ ਕੋਰੋਨਾ ਵਾਇਰਸ ਦੇ ਕੁੱਝ  ਮਰੀਜ਼ ਡਾਕਟਰਾਂ ਦੇ ਕੁੱਝ ਓਹੜ ਪੋਹੜ ਨਾਲ, ਵਾਇਰਸ ਲਈ ਪੌਣਪਾਣੀ ਦੀ ਅਨੁਕੂਲਿਤਾ ਕਾਰਨ ਜਾਂ ਫਿਰ  ਮਨੁੱਖੀ ਸਰੀਰ ਦੀ ਬਣਤਰ ਅਨੁਸਾਰ( ਅੰਦਰੂਨੀ ਸ਼ਕਤੀ )ਰੋਗਾਂ ਨਾਲ ਲੜਨ ਲਈ ਸਮਰੱਥਾ ਦੀ ਕੁਦਰਤ ਨੇ ਮਨੁੱਖ ਨੂੰ ਇੱਕ ਬਖ਼ਸ਼ੀ ਹੋਈ ਅਨਮੋਲ ਦਾਤ ਕਾਰਨ ਮੌਤ ਤੋਂ ਬਚ ਰਹੇ ਹਨ ਹੈ। ਪਰ ਕੋਰੋਨਾ ਵਾਇਰਸ ਦੇ ਜਾਣ ਤੋਂ ਬਾਅਦ ਇਹ ਧੂਆਂ ਧਾਰ  ਪ੍ਰਚਾਰ ਕੀਤਾ ਜਾਵੇਗਾ ਕਿ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਜੀ ਦੀਆਂ  ਨੀਤੀਆਂ ਅਤੇ ਉਨ੍ਹਾਂ ਦੇ ਮਨ ਕੀ ਬਾਤ ,ਥਾਲੀਆਂ ਖੜਕਾਉਣ, ਦੀਵੇ ਜਗਾਉਣ ਅਤੇ ਅਖੌਤੀ ਧਾਰਮਿਕ ਲੁਟੇਰਿਆਂ ਵੱਲੋਂ ਅਰਦਾਸਾਂ ਅਤੇ ਧਾਰਮਿਕ ਗੁਰੂਆਂ ਵੱਲੋਂ ਹਵਨ ਕਰਨ ਜਾਂ ਫਿਰ ਜੋਤਸ਼ੀਆਂ ਵੱਲੋਂ ਤੇ  ਤਾਂਤਰਿਕਾਂ ਵੱਲੋਂ  ਕੀਤੇ ਉਪਰਾਲਿਆਂ ਸਦਕਾ ਇਸ ਕੋਰੋਨਾ ਵਾਇਰਸ ਨੂੰ ਡਰਾ ਧਮਕਾ ਕੇ ਭਜਾਇਆ ਗਿਆ ਹੈ ਅਤੇ ਮਨੁੱਖੀ ਜਾਨਾਂ ਬਚਾਈਆਂ ਜਾ ਸਕੀਆ ਹਨ। ਅਤੇ ਸਭ ਦਾ ਧੰਨਵਾਦ ਕਰਨ ਲਈ ਫੁੱਲਾਂ ਦੀ ਵਰਖਾ ਕੀਤੀ ਜਾਵੇਗੀ। ਪਰ ਸੱਚ ਸਾਡੇ ਸਾਹਮਣੇ ਹੈ ਕਿ ਕੋਰੋਨਾ ਵਾਇਰਸ ਦੀ ਕੋਈ ਦਵਾਈ ਨਹੀਂ ਹੈ। ਧਾਰਮਿਕ ਸਥਾਨਾਂ ਨੂੰ  ਜਿੰਦੇ ਲੱਗੇ ਹੋਏ ਹਨ ਅਤੇ ਸਭ ਕੋਰੋਨਾ ਵਾਇਰਸ ਤੋਂ ਬਚਣ ਲਈ ਲੁਕੇ ਬੈਠੇ ਹਨ ਅਤੇ ਸਰਕਾਰੀ ਹਸਪਤਾਲਾਂ ਵਿੱਚ ਹੋਰ ਬਿਮਾਰੀਆਂ ਨਾਲ ਜੂਝ ਰਹੇ ਮਰੀਜ਼ਾਂ ਨੂੰ ਡਾਕਟਰ ਕੋਰੋਨਾ ਵਾਇਰਸ ਦੇ ਡਰ ਕਾਰਨ ਹੱਥ ਤੱਕ ਨਹੀਂ ਲਾ ਰਹੇ। ਹਫ਼ਤੇ ਬਾਅਦ ਮੋਦੀ ਸਾਹਿਬ ਟੀ ਵੀ ਚੈਨਲਾਂ 'ਤੇ ਦਿਸ਼ਾ ਨਿਰਦੇਸ਼ ਜਾਰੀ ਕਰ ਕੇ ਪਤਾ ਨਹੀਂ ਕਿੱਥੇ ਲੁਕ ਛਿਪ ਜਾਂਦੇ ਹਨ ਜਿਹੜੇ ਪਿਛਲੇ ਸਾਲਾਂ ਵਿੱਚ ਵਿਦੇਸ਼ਾਂ ਵਿੱਚ ਹੀ ਘੁੰਮਦੇ ਰਹਿੰਦੇ ਸਨ।ਸੱਚ ਤੁਹਾਡੇ ਸਾਹਮਣੇ ਹੈ  ਇਸ ਨੂੰ ਮੰਨਣਾ ਜਾਂ ਨਾ ਮੰਨਣਾ ਤੁਹਾਡੀ ਇੱਛਾ ਹੈ। ਸੱਚ ਕੁਨੀਨ ਦੀ ਗੋਲੀ ਨਹੀਂ ਜਿਸ ਨੂੰ  ਪਾਣੀ ਦੇਣ ਘੋਲ਼ ਕੇ ਉਸ ਤਰ੍ਹਾਂ ਪਿਲਾਇਆ ਜਾ ਸਕਦਾ ਹੈ ਜਿਵੇਂ ਮਲੇਰੀਏ ਦੇ ਮਰੀਜ਼ ਨੂੰ ਪਾਣੀ ਵਿੱਚ ਘੋਲ ਕੇ ਪਿਲਾ ਕੇ ਮਲੇਰੀਆ ਭਜਾਇਆ ਜਾ ਸਕਦਾ ਹੈ। ਸੱਚ ਸਮਝਣ ਲਈ ਕੁਦਰਤ ਨੇ ਹਰੇਕ ਵਿਅਕਤੀ ਨੂੰ ਦਿਮਾਗ਼ ਦਿੱਤਾ ਹੈ ।ਇਸ ਦੀ ਵਰਤੋਂ ਕਰਕੇ ਸੁਚੇਤ ਹੋਵੋ ਅਤੇ ਮਨੁੱਖ ਹੱਥੋਂ ਮਨੁੱਖ ਦੀ ਲੁੱਟ ਖ਼ਤਮ ਕਰਨ ਲਈ ਸ਼ਹੀਦੇ ਆਜ਼ਮ ਸ ਭਗਤ ਸਿੰਘ ਦੀ ਸੋਚ 'ਤੇ ਪਹਿਰਾ ਦਿਉ। ਉਸ ਦੇ ਦਿੱਤੇ ਕਾਜ਼ ਨੂੰ ਉਸ ਤਰ੍ਹਾਂ ਪੂਰਾ ਕਰੋ ਜਿਵੇਂ ਤੁਸੀਂ ਸਾਰੇ ਪੜ੍ਹਦੇ ਸਮੇਂ ਅਧਿਆਪਕ ਵੱਲੋਂ  ਪੜ੍ਹਨ ਲਿਖਣ ਲਈ ਘਰ ਦਾ ਦਿੱਤਾ ਗਿਆ ਕੰਮ ਕਰਦੇ ਸੀ।

ਸੁਖਮਿੰਦਰ ਬਾਗ਼ੀ ਸਮਰਾਲਾ
ਮੋਬਾਈਲ ਨੰ 9417394805